Matelin
Deùéh mat d’oh, kanderù Julian.
Huézein e hret ;
Edan en tumdér ag en han,
Men é oh bet ?
Kavet e hues un hent kalet.
Amzér ponér,
Ha neoah m’hou kuél é vonet
Koutant d’er gér.
Julian
Ia koutant on, o Matelin.
Guir é laret.
Me zou bet é parréz Guénin
E perhinded.
Er Huerhiéz ag er Ma?néguen,
Me mam santél,
En des cheleuet me feden
En hé chapél.
Er Ma?néguen em es pedet
A greiz kalon,
Ha get Doué em es reseùet
Ur guir pardon ;
Chetu perak é on joéius,
O Matelin,
Gloér de Vari, gloér de Jézus
Eit birùikin !
Matelin
Konz e hret d’ein a dreu neué
Ne houien ket
En devoé Mari ér vro-sé
Ur léh choéjet.
Me ven eué monet, Julian,
D’er Ma?néguen,
Monet genoh er blé ketan
E garehen.
Mes laret d’ein penaus é ma
Er chapél sé
Saùet d’en Intron Varia
Ar ur ma?né ;
Penaus é ma er Barréz-hont,
Guénin hanùet,
Petra e hues guélet duhont
Tré ma oh bet.
Julian
— Matelin kéh, me hrei aben
Hou volanté,
Mes un herrad ér hoaskeden
Damb de azé.
A vro Guénin get plijadur
E konzein d’oh ;
E Breih ne gavér a dra sur
Ur vro kaèroh.
Er Ma?néguen e vé guélet
Pèl tro ha tro,
E ben ihuél e zou saùet
A drest er vro :
Ar lein é ben èl ur gouron
Chapél Mikél
E lar d’emb ol, perhinderion :
? Sellet ihuél. ?
Izéloh eit chapél Mikél
Ar en dichen,
E ma iliz Intron santél
Er Ma?néguen.
Doh er saù-hiaul ag er Ma?né
Hui hé guélou
Saùet a houdé pemp kant vlé :
Bout zou guersou
Arlerh en histoér, e gannen.
E lar eué
Penaus bamnoz ar en dosten
Epad ur blé
E oé bet guélet, ó burhud,
Ur splandér guen
E ligerné dirak en dud
El ur stiren.
Kent pèl amzér, er Guénizion
Gredus er fé,
E saù ou chonj bet en Intron
Stiren en Né ;
Ind e lar : ? Er Huerhiéz santél,
Mari, mam Doué,
E houlen genemb ur chapél
Ar er ma?né.
Nezé en dud ag er barréz
Bras ha bihan,
E labour aveit er Huerhièz
Keti-ketan,
Aveit seùel ar en dosten
Un iliz gaèr
D’en Intron ag er Ma?néguen
Mam hur Salvér.
Matelin
— Doh hou kleuet, kanderù Julian,
Ne chuéhan ket
Mes un dra hoah e houlennan,
Mar er gouiet :
Perak é hanùér Ma?néguen
Er ma?n?-sé.
Emen en des vennet dichen
Roua?néz en Né ?
Julian
A houdé ma oé bet guélet
Ur splandér guen
E ligernein de noz perpet
Ar en dosten,
Er Ma?néguen, chetu en hanù
Reit d’er ma?né
Emen e oé guèlet guen-kann
Er splandér-sé.
A chapél er Huerhiéz Vari
Konzamb bremen :
Ne gaveet ha?ni èldi
Er hornad-men.
Kalz a barrézieu én ur bro
Em es hantet,
Ur chapél éldi pèl ardro
Ne gavan ket.
Ti en Intron e zon kuhet
E kreiz gué bras,
Ar en deval é ma saùet
Durheit d’en dias ;
Ag én or dal betag er hér
Hemb poén erbet,
Er béleg étal en autér
E vé guélet.
Tostig tra de viùen er hér
En tu d’er lein
Limaj er Huerhièz e huélér
Ar ur tron mein :
En Intron get hé mab Jézus
Ar hé divréh
E zeval ur sel truhéus
Ar nomb dalbéh.
Azé doh limaj er Huerhiéz
Hur mam karet
Eleih a dud é kreiz ou gloéz
En des pedet.
E kevér en ol mizérieu
Lan a druhé
Mari en des séhet dareu
Hé bugalé.
Doh er balustr é vé guélet
Ur limajig
En ur vouistr guir é ma cherret
Ar un daulig.
E vokein d’er limajig-sé,
Liés a huéh,
Tud klan en des kavet get Doué
Iéhed kentéh.
Doh er vangoér em es lénet
Ar un daulen
En induljanseu dakoret
Er Ma?néguen,
Dakoret d’er berhinderion
Eit birùikin
De houil merh ha sul er pardon
E gourhelin.
En déieu-sé mar kovéset
Hou péhédeu
Er Ma?néguen e kavéet
Induljanseu
Reit é kours er Honsil a Drant
D’er fidéled
Aveit ou dégas berùidant
D’er perhinded.
En drivet sul tost d’en ùigent
E gourhelin
Deit de bardon er Ma?néguen,
O Matelin ;
Hui e gavou get Mam Jézus,
Hou mam eué
Er madeu kaer ha présius,
Greseu en Né.
Kenavo d’en Intron santél
P’em es laret,
Betag iliz Mikél arbél
Em es krappet ;
Enou er blein ag er manné
Ihuél d’er lein,
O na hamet é sellen mé
Tro-ha-tro d’ein !
Kaeret ur vro e vé guélet
Ag er léh-sé !
En deulegad ne chuéhant ket
E guirioné,
A pe sellant a drest Pluniaù
Pél én amzér
Kelùen, Laudek, Noal, Sant Téliau
Hag er Voustoér.
Doh er saù-hiaul é huélèr Nein,
Bignén, Kolpeu,
Mouriek, Remungol ha Plérin,
Kalz a vroieu ;
Guélet e vé doh er hreiz-dé
Gregam, Lanvaud,
Doareuiér er Chapél-Neué,
Kamors ha Baud.
Doh er huh-hiaul borhig Guénin,
En ur flangen
E zou un hantér-leù hemb kin
Doh en dosten.
En iliz borh e gavan braù,
En tour eùé.
Ne huélan ket kalz én ou saù
Braùoh eité
Izél d’en dias chetu en stér,
Evel hanùet
E rid é kreiz er pradeuiér
Hemb trouz erbet ;
Hi e dremen a gam-droieu
Er héauten glas
Eit kas ataù hé houlenneu
Bet er mor bras.
Matelin
Erhoalh, Julian, e hues laret,
Trugéré d’oh !
Arlerh Guénin ne huélér ket
Ur vro ka?roh.
Monet e hrein, mar plij get Doué,
D’er Ma?nèguen.
Kemér en hent me garehé
Bremen aben.
Mès me hortei devéhatoh,
Miz gourhelin
Eit monet ar ur dro genoh
De vro Guénin.
Parréz Guénin, eurus parréz,
Doar beniget,
Hi e zou parréz er Huerhiéz,
Hé léh karet.
————
|
